Eg har fått lopper...

Dette er ei fugleloppe. Ein av fleire fine loppemarknadskattar ♥ Denne helga har vore rett triveleg. Besøk på loppemarknader, besøk av familie og vener og elles tilfeldig prat med flotte folk, god mat, avslapping, sølvpuss, latter og eigentleg ganske bra vêr... Kva meir kan ein ønske seg den første helga i april? Eg har faktisk, i teorien, lært korleis eg skal ta avleggarar av lavendelplantar. Og visst eg berre greier å omsette teori til praksis, så skal det etter kvart bli reine lavendelland rundt VillaSørheim om nokre år ♥
 

Apropos lopper - ord som betyr fleire og vidt forskjellige ting - eg fekk kjøpt eit knippe heklabrikker som må bleikast. Desse kom eg på medan eg leika i lag med ungane i ettermiddag: "Nei, eg har visst nåkke eg må klore" sa eg, og reiste meg for å avslutte leiken. "Eeehm..!?" svarte storebror i huset nølande "eg håpa ikkje det er meg du har tenkt å klore!?". Eg knakk i hop i latter då eg forstod kva han eigentleg hadde sett føre seg, men han derimot syntest ikkje det var morosamt at mamma kunne komme på noko så bak mål - å skulle klore ungane sine med negler på krumma fingre, akkurat som at det skulle vere like artig som å kitle nokon..

Nostalgiske heklabrikker passer vel perfekt saman med sølvfat, pynta med ein enkel sølvlysestake, ein sølvfarga spurvefugl med stjert til å åpne flasker med, ei smørbrødklype i sølvplett og ei skjønn bjelle.. Sistnemnde skal toastmasteren få æra av å ringe med i bryllaupet vårt tenkte eg - om ho skulle trenge noko med skarp lyd til å fange merksemda med.

Denne helga har eg lært at å pusse sølv er ikkje det kjekkaste eg veit medan eg pusser, men etterpå derimot kjenner eg meg som ei vassekte kråke. Eg kjenner det frå topp til tå når metallet glimer blidt til meg, og eg blir så glad så glad når eg veit det er mitt! Mitt fat - for det var eg som fann og kjøpte det, og mi glimring - for det var eg som pussa det og fekk fram det fine mønsteret og det vakre skimmeret... Nydeleg ♥

Eg fekk meg enda eit lysfat, og ei smørbrødklype til, og så ei enkel og skjønn glaskrukke med lok. Prisane var enkle og skjønne dei også.. ♥ 30,- for alt på bildet under er ikkje verst!!

Vi fekk oss nokre større lopper også. Ei svær kiste i heiltre, malt i verdas kanskje grellaste farge. Takk og lov for pussemaskiner og malingsutstyr, for denne kan verkeleg bli fin når sommarferien har fått virke på meg sjølv og dermed også på kista ;) Slagbenken skal også pussast og malast, sjølv om fargen eigentleg er grei - den er berre ikkje så fint påført og har elles ein del overfladiske skader.. Men så lenge den vert ståande i entréen i denne leilegheita er den god nok som den er, så den får vere sitt gamle, gode enda nokre månader før den kjem i pussemaskina og malekosten si vald den også.

Mitt siste funn var det største røvarkjøpet også. Eg fekk ei gammal klesrulle til ein skarve hundrelapp. Fullt brukbar også, sett vekk frå ein alminneleg skrue som må byttast, eller om eg er skikkeleg heldig så treng den berre etterstramming. Det verste er at eg angrar på at eg ikkje kjøpte begge - for ja, der var to som var heile og fine!! Men men... Mannen er nok glad for at eg berre tok den eine ;) ...ellers hadde han kanskje pakka kofferten og dratt? ...i alle fall kanskje på langhelg heim, med eit flyttelass, allereie i morgon, sånn for å få unna litt før den verkelege flyttinga med alt av nytt og gammalt pikkpakk tiltar om berre få månader...

Og ja, for ikkje å gløyme; Det vart jammen litt tekstilar på meg også, som skal få nytt liv som kostymer, vimplar og sikkert som kjolar også. Mulig eg må sy nokre klede til storebror også, for han synest det er kjedeleg at det berre er veslesyster som får heimesydd. Men kjolar er enklare enn bukseplagg tenkjer eg, og difor slo eg til når eg fann ei loppis-bok om sying med enkle mønster for nybegynnarar.. Så får vi sjå kva det blir til.

Og med dette har eg vist fram det meste av denne helgefangsten. Veit om to fine loppemarknader i området neste helg også, og om mannen tillet at eg potensielt kjem heim med enda litt meir dill og dall no før flyttinga, så tek eg meg gjerne ei skattejakt neste laurdag eller søndag også. Loppemarknader er kjekt!

Endeleg helg

Dei siste dagane vekene har vore skikkeleg seige. Det vil sei - vekene i seg sjølv er vel ikkje seige, det er meir eg som har gjort dei seige. Orkar ikkje, vil ikkje, gidder ikkje... Men så til det positive: Eg føler seigheita har løsna litt i dag. Har fått gjort litt. Litt.

Har lyst på dymomaskin,

så eg kan merke for eksempel denne

hermetikkboksen med "Q-TIPS",

etter inspirasjon fra Rare Rina

som har merka massevis av ting og tang...

Å ha gjort litt er bedre enn å ha gjort ingenting - det er viktig å klare å sette fingeren på det positive, om det no er aldri så lite! Eg har fått handla brudeskoene mine. Heilt enkle, og absolutt ikkje oppspjåka i det heile. Glatte, enkle, lave, fine ballerinasko. Pure & precious... Eg gler meg til å gå med dei, til å vere i mine eigne sko. Det kjennest som å gå barfota - ingenting som klemmer eller kniper eller gjer det tungt å gå. Det beste er at eg slepp å øve meg på å gå på høge hælar fram mot bryllaupsdagen - det er noko eg verkeleg ikkje kan, og som eg ikkje har behov for å lære. Eg vil ikkje vere høgare, og eg vil ikkje gå rundt som ein nyfødt kalv i bryllaupet.

Apropos kalv. Eg har fått meg ein liten, ny mjølkemugge. Er den ikkje heilskjønn vel!? 19,- billege kroner hos Coop Obs! ...mannen seier at det ikkje er noko som heiter billege kroner, men eg tipper du godt kan skjønne kva eg meiner... Uansett så har eg i alle fall ein kalv som spytter melk i kaffien min, ettersom eg ikkje liker å drikke den svart. Når kaffien liknar sølevatn liker eg den best!

Elles var eg innom Kremmerhuset ein tur i dag - som eg alltid er når eg er i sentrum. Og som alltid elles når eg er innom, så hadde dei også denne gongen mykje fint. Det er elles ikkje feil at dei ofte har fine prisar på ting og tang også. Denne gongen fekk eg meg ein fin sinkboks til førstehjelpsutstyr.

Hos oss er førstehjelpsutstyr einsbetydande med eit stort utval plaster, dekorert med eit stort utval kommersielle figurar. Det er viktig med valmogelegheiter når ein ikkje har store sår, men allikevel ynskjer å pynte fingrane litt... Og pakkane med überkommersielle plaster dekorert med HelloKitty, Batman og Jungelboken-figurar passar perfekt oppi denne boksen. Det avrivne lòket til den eine plasterpakken fungerar som støtte så ikkje pakkane ramlar ned inni boksen, og elles som eit lite eige rom til å legge sårsalva i...

Kremmerhuset hadde salg på boksar i dag. Eller nærare bestemt i går, i dag og i morgon. Så om du treng eller har lyst på nokon boksar derfrå, så er det tid for å ta turen innom Kremmerhuset på Galleriet i morgon.. Eller kanskje alle Kremmerhuset-butikkane har dette salget no? Verdt å ta turen innom uansett.. alltid.. Sidan det var salg så kjøpte eg denne klype-boksen, i samme serien som vaskemiddelboksane og reingjeringsbøtta som eg alt har. Hadde eigentleg lovd mannen å vente til vi flytta heim, så vi slapp meir husfyll i leilegheita. Men er det salg så er det salg. Og no var det altså salg ♥

Det ser visst ut til at det vesle eg har gjort i dag er å kose meg med ei lita shoppingrunde i sentrum. Men eg har altså fått rydda, støvesugd og vaska halve heimen også! Så no har eg nytt kvelden heime i vår lavendelluktande leilegheit. I morgon vert det som sagt loppis, og så bør eg gjerne få unna vasken i andre halvdel av heimen også før eg set meg og les til kunnskapen tyter ut øyra... No er det natt. Må jo vere utkvilt til skattejakta etter bruktfunn! ..kanskje får vi oss ei loppejakt på søndag også?!

Dette vert ei GOD HELG ♥

  

Lopper i blodet

Det beste med vår, etter det faktum at snøen forsvinn og naturen våkner til liv... Vel, det var jo kort oppsummert ALT våren i seg sjølv eigentleg dreier seg om, men allikevel: Loppemarknader! DET er det beste med våren, som ein god nummer to etter alt det våren altså eigentleg dreier seg om..  (Kvifor fatte seg kort og lettfatteleg, når ein kan gjere det langtekkeleg og komplisert?)

Kanskje finn eg fleire fine stoff?

Like mykje som eg gler meg til varme dagar (eg kan ikkje få sagt det nok) og høve til å samle fleire fregner, ettersom det ikkje er mykje anna brunfarge å hente i sola for mitt vedkommande, så gler eg meg til å tråle loppemarknader. Til helga er dei første i området her, som eg veit om... Det kriblar av lopper i blodet frå topp til tå, i pur glede og lengsel etter at dagen skal komme. Gamle småmøblar, koffertar, lamper, tekstilar og gamle bøker er førsteprioritet - så sant eg ikkje tilfeldigvis snublar over noko anna på vegen... Norgesglas hadde heller ikkje vore å forakte. Eg vil nemmeleg prøve å lage ei lampe av slike også ♥

Fine bilder til veggane hadde ikkje vore dumt å finne...

 

Mannen har i alle høve kontroll på kva skulelokaler vi skal til, og eg har kontroll på pengane vi skal ha med oss. Perfekt ansvarsdeling. Håper han synest det samme når dagane er over og innkjøpa er gjort, med eller utan han tilstades.. Vi har det nemmeleg med å komme bort frå kvarandre når vi er på slike stader, ettersom vi kikker etter litt ulike saker. Men igjen - det er nettopp då og derfor det er perfekt at eg er økonomiansvarleg akkurat desse dagane. 

Kanskje vert det symaskin til veggcollagen?

Og så skal eg sjå etter trekasser, gamle bøker, norgesglass, tallerkenhyller, settekasser, barnemøbler, sølvplettsaker, gammal kjøkkenvekt... og alt anna som eg ikkje kjem på nett no... ♥